Parole ed emozioni di Rosario Ruggiero

Omaggio a Pulcinella

Quattro secoli fa nasceva Pulcinella e quest’anno, in occasione del quattrocentesimo genetliaco della celebre maschera, si moltiplicano a Napoli le iniziative per ricordarla, celebrarla, ma soprattutto approfondirla. Così, dall’appassionato sforzo organizzativo di Umberto Francese, abbiamo già avuto un convegno preliminare, un simpatico “processo” ed una mostra di arti figurative. Il 30 aprile scorso anche un gradito spettacolo di musica e poesia nello splendido salone del Circolo Ufficiali dell’Esercito Italiano, in piazza del Plebiscito, con copiosa partecipazione di attori (Liliana Palermo, Maria Grazia Renato, Anna Calemme ed Vincenzo De Simone), cantanti (Giuseppe D’Angelo, Yamila Rumayor Sosa e Carlo Missaglia), l’intervento del linguista Carlo Iandolo e del Coro Polifonico Universitario “Hippokrim” diretto da Natalino Palena. Ma in un mondo dove tutto incessantemente cambia sempre più in fretta e che in questi ultimi quattro secoli ha visto radicali trasformazioni sociali e l’avvento dell’uso dell’energia elettrica, dell’automobile, della radio, del cinema, della televisione, del telefono, dell’aeroplano, dell’informatica, dell’esplorazione spaziale e di sorprendenti sviluppi medici, cosa rimane di quella semplice, candida figura dalla maschera nera? È quanto ci dicono i recenti versi dei poeti Vincenzo De Simone e Nazario Napoli Bruno.

Pulsinell

Nc’é chi dice ca sî nnato

cu na macchia nera nfaccia;

na palomma t’ha lassato

pe vestito na petaccia:

na casacca janca janca,

nu cazone a zompafuosso;

cu nu naso ’e na pullanca

e na faccia pelle e ossa.

Nu cappiello mise ’e sgherra

ncopp’â capa a cucuzziello,

nu cafone nato ’a Acerra

e p’’e nnomme “Pulsinell”.

Nc’é chi dice c’assaje primma,

verso ’o milleequattuciento,

comme fosse na chiantimma,

chine ’e famma e sentimento,

ggiá na maschera tenimmo,

cu nu nomme ’e farenella:

“Maccarone”, ’stu sfaccimmo,

nato e muorto cca ad Atella.

Nc’é chi penza addirittura,

sî pparente ’e “Arlecchino”,

chesta é ssola cungettura;

tu sî nnato pullicino.

Cu  nu “sgherlo” comme voce,

tale e quale ’a na gallina,

tu nchiuvave ncopp’â croce

’a nu Rre nzieme â Riggina.

C’’o cugnomme ’e nu “Cetrulo”,

mise affianco a “Pulsinell”,

t’hanno fatto “amante” o sulo

“traditore” e “nnacchennella”..

Tu sî stato “giacubino”

o nu “finto servitore

nnammurato ’e Culumbina”,

o nu semplice “pittore”. 

Si pigliave, po, ’e mmazzate,

ncopp’â capa, areto ’e rine,

se iencheveno ’e triate,

spiciarmente ’o “San Carlino”.

Cu Petito addeventaste

nu suvrano, primmo attore,

da nu servo, po, nu masto,

prufessore e, po, duttore.

Tu sî stato mundiale:

Norimberga...Francoforte;

maje na vota nu giurnale

ch’hêsse scritto ’e chesta sciorta.

Tutta ’a forza ll’hê tenuta ,

grazie ô pubblico presente,

pe na mossa,na battuta,

o na risa sulamente.

Cu De Muto nun sî mmuorto,

comme penza quaccheruno;

se pigliassero ’stu ttuorto,

tuttequante ’a uno ’a uno.

Pulsinell se ne gghiuto,

ma ha lassato pe cuntegno,

ncopp’ê ffacce scanusciute,

’e na maschera nu segno.

                                      Vincenzo De Simone

Pullecenella?

Doce, ’o Vesuvio

se stenne a mmare,

janca, na vela

n’auciello pare...

Albante juorno

dorme, ’a Città,

ma, dint’a nniente

se scetarrà...

Fernesce ’o suonno

doce e ’ncantato,

mo n’ato juorno

è accumminciato

e, comme ’o sango

trase ’int’ ê  vvene,

torna ’a fatica,

tornano ’e ppene.

Migliàra ’e facce

affaccennàte

vanno p’ ê sstrate,

sballuttuliàte... 

ognuno cerca

’e s’arrangià

ch’è assaje difficile

chistu ccampà.

Ce sta chi spànteca

cu ffantasia

e chi va zuòppeco

p’ â retta via...

Ma chi è ggiovane

nun s’accuntenta

pecché nisciuno

ll’ha ditto niente

e arrobba e afferra

chello che vvô;

chest’è nna guerra,

scappa chi pô!

’Sti figlie ’e Nàpule,

perdute ggià,

cu nna serenga

vônno campà! 

E qquanta vote

chesta Città

se tegne ’e sango

senza pietà!

’Sta suggità

comm’è fferoce!

Chi ha dd’alluccà

sta senza voce. 

Addò sta cchiù

chell’allerìa

c’ha fatto ’e Nàpule

sole e ppoesia?

A cchisti figlie

che ll’hâmmo date?

Ll’hâmmo arrubbate

tutt’ ’o ppassato!

E mmo se trovano

nfacci’a nnu muro

senza speranza,

senza futuro... 

... È scesa ’a notte...

’a luna amica

mo veste ârgiento

’sta scena antica...

mmiez’annascuso

’ret’a nna stella,

chiagne nna làcrema

Pullecenella...  

                      Nazario Napoli Bruno