Ne' Genna'

di Franco Celentano

Caro Gennaro, scusa 'a cunferenza,

pe Napule 'a può fà 'na preferenza,

tant'anne 'e devuzione e fedeltà

'nce danno 'stu diritto, nè Gennà!

'Stu popolo scugnizzo e pensatore,

primma t'ha fatto pate e prutettore,

po' s'è pigliato 'o rito 'nziem''a mano

dannete 'o core 'e 'nu napulitano.

Te parlano cu 'o tu, campe int''e viche,

se spartono cu tico 'e piante antiche,

trase int''e vascie, dint''e casarelle,

tiene nepute, frate e cummarelle.

Chi te dimmanna 'a grazia pe 'nu figlio,

chi vene dint''o Duomo, pe cunsiglio,

chi cerca 'e te fà fesso e, aret''e spalle,

te chiamme delinquente e "faccia gialla".

Pe te 'na grazia è sulo 'nu favore,

'na cosa 'e niente ca te fà 'o Signore,

e 'o popolo d''e viche, ca 'nce crere,

corre addò pato, pe cercà 'e piacere.

E allora, faccia gialla, nun fà 'o fesso,

nun dicere ca 'o munno è sempe 'o stesso,

fall''accapì ca tu staje 'ntussecato,

pe mezzo ca 'stu popolo è cagnato!

Tu sciuoglie 'o sanghe, comme fosse niente,

miette 'a speranza dint''o core 'a gente,

e chi nun vo' accapì ca stà sbaglianno

dice che pure tu te staje adeguanno.

Ma mo' fà l'ommo, miettete 'o cazone,

chiava mazzate, fà 'a rivoluzione,

nunn'essere fifone e indifferente,

aiuta 'e buone e caccia 'e malamente!

Fallo accapì ca chesta prutezione

spetta a chi tene 'o core 'e 'nu guaglione

e 'a cunferenzia ca c'ive assicurata

primma ci'a diste e mo' t'a si' pigliata.

'O sanghe nunn'o sciogliere, Gennà,

lassela senza pate, 'a 'sta città.

Comme fernesce ancora nunn''o saccio

ma, perlomeno, tu t'a salve...'a facci