Natale  

di Colomba Rosaria Andolfi

E’ festa! Già Natale

se sente dint’a ll’aria:

pazzielle, bancarelle

e tanta lumminaria.

’E roccocò l’addore,

’e pesce sporte sane,

anguille, capitune,

tinozze ’e frutte ’e mare.

’O panettone, struffole,

cassata ’a siciliana…

riale a chisto, a chillo

pe’ festiggià Natale.

E dint’ ’a via se spanne

nu suono chianu chiano

e me s’astregne ’o core

sentenno ’e zampugnare.

D’ ’o cielo, bambeniéllo,

tu scinne ògne Natale,

però chi se n’è ghiuto

ccà mò nun torna maje.

E  brilla dint’ ’o scuro

chill’albero ’e Natale

e volle ’ncopp’ ’o ffuoco

’o zuco int’ ’a tiana.